Mobil og nettbrett

Placepoint køyrer i nettlesaren og er laga for Mac og PC. På nettbrett fungerer det, med avgrensingar. På mobil er det svært avgrensa. For nettlesarversjonar, maskinvare og feilsøking, sjå Systemkrav.

Kjem det ein app for iPhone og Android i App Store og Google Play?

Ikkje no. Placepoint er ein avansert nettapp som brukar teknologi som i praksis berre er tilgjengeleg i nettlesaren, mellom anna WebGL2 for 3D-kartet. Ein eigen iOS- og Android-app må byggje store delar av dette på nytt, i to kodebasar som skal vedlikehaldast ved sida av nettappen. Det er eit monaleg stykke arbeid, og det er ikkje prioritert.

Du kan leggje Placepoint på heimskjermen på telefon og nettbrett og få eit ikon å trykkje på, i staden for eit bokmerke i nettlesaren. Framgangsmåten står nedst på sida.

Meir: Systemkrav.

Kan eg bruke Placepoint på nettbrett?

Ja, med avgrensingar. Placepoint fungerer på iPad og andre nettbrett i dag. Det er nyttig undervegs mellom møte og på synfaring: du kan slå opp ein eigedom, sjå kartlag og hente fram eigedomspanelet. Min posisjon i verktøyraden til høgre sentrerer kartet der du står, og vart laga nettopp for bruk ute i felt.

Avgrensingane er dei same som på ein liten laptop: panel og lister får mindre plass, tunge 3D-scener går tregare enn på ei datamaskin, og funksjonar som treng høgreklikk eller at peikaren blir halden over eit element, har ikkje alltid ein berøringsvariant. Til sjølve arbeidet tilrår vi framleis Mac eller PC med stor skjerm.

Meir: Kartgrensesnittet: Finne posisjonen din, Systemkrav.

Fungerer Placepoint på mobil?

Svært avgrensa. Du kan logge inn, søkje opp ei adresse og opne eigedomspanelet, men kartet, panela og verktøylinjene er laga for å visast samtidig på ein stor skjerm, og på ein telefon får dei ikkje plass. Placepoint er ikkje laga for telefon, og vi lagar ikkje ein eigen telefonversjon. Bruk Mac eller PC, eventuelt nettbrett.

Meir: Systemkrav.

Kan eg vere innlogga på PC og nettbrett samtidig?

Nei. Ein konto kan berre vere innlogga på éi eining om gongen. Loggar du inn på nettbrettet, blir PC-en logga ut, og omvendt. Det er med vilje: kontoen er personleg, og éi aktiv innlogging er det som hindrar at eit innlogga nettbrett eller ein telefon blir brukt av nokon andre enn deg.

Meir: Konto og innlogging.

Korleis legg eg Placepoint på heimskjermen?

Opne app.placepoint.no i nettlesaren på telefonen eller nettbrettet, og legg sida til på heimskjermen:

• iPhone og iPad (Safari): trykk delingsikonet nedst (firkanten med pil opp), bla ned og vel Legg til på Hjem-skjerm.
• Android (Chrome): trykk menyknappen med dei tre prikkane øvst til høgre, og vel Legg til på startsiden eller Installer app.

Du får då eit Placepoint-ikon på heimskjermen som opnar løysinga i eit eige vindauge utan adressefelt og faner. Det er den same nettappen, ikkje ein app frå App Store eller Google Play, så han blir oppdatert automatisk saman med resten av Placepoint. Første gongen må du logge inn, som i nettlesaren.

Meir: Konto og innlogging, Systemkrav.