Personvern og databehandling
Her er svara innkjøp, juridisk og personvernombod spør etter før ein avtale: kva roller vi har etter personvernforordninga, korleis de får tilgang til personopplysningar, når det trengst ein databehandlaravtale, kvar dataa ligg, kva underdatabehandlarar vi brukar, og kva som skjer når eit KI-verktøy hentar data frå Placepoint.
Send spørsmål som ikkje er svara på her, til support@placepoint.no.
Roller etter personvernforordninga
Er Placepoint behandlingsansvarleg eller databehandlar?
Begge delar, for kvar sin type data.
- For eigedoms- og selskapsdataa vi samlar inn og vidareformidlar, mellom anna frå grunnboken, matrikkelen og Brønnøysundregistrene (BRREG), er vi sjølvstendig behandlingsansvarleg etter GDPR artikkel 4 nr. 7. Vi bestemmer formål og middel for innsamlinga, og du får dataa utleverte frå oss. Det er ikkje eit databehandlaroppdrag, og det gir deg ikkje instruksjonsrett over registerdataa. Kva felt i leveransen som er personopplysningar, står i Integrasjon og tryggleik.
- For data du sjølv legg inn i Placepoint, altså eigne datasett, prosjekt, notat, taggar og det du skriv i eit søk eller eit oppslag, er du behandlingsansvarleg og vi databehandlar etter artikkel 4 nr. 8. Vi behandlar desse dataa berre for å levere tenesta til deg.
- For opplysningane om deg som brukar, det vil seie namn, e-post, telefonnummer og innloggings- og bruksdata, er vi behandlingsansvarleg. Det står i personvernerklæringa.
Du er på di side behandlingsansvarleg for kva du brukar registerdataa til vidare. Det gjeld same om du hentar dei i Fusion, gjennom Placepoint API eller gjennom eit KI-verktøy. Gir du dei vidare til andre, gjeld reglane i Utlevering av PII til tredjepart.
Kvifor er ikkje registerdataa eit databehandlaroppdrag?
Fordi vi ikkje behandlar dei på ditt oppdrag. Vi hentar grunnbok, matrikkel og føretaksdata inn frå kjeldene, set dei saman og tilbyr dei likt til alle kundane våre. Ein databehandlaravtale for registerdataa ville gitt kvar enkelt kunde instruksjons- og sletterett over eit datasett som er felles, og det lèt seg ikkje gjere. Utleveringa skjer i staden under avtalen vår med Kartverket og innanfor forskrift om utlevering, vidarebruk og anna behandling av opplysningar frå grunnboken og matrikkelen § 4, som òg krev at du som mottakar har eit sakleg behov.
Tilgang til personopplysningar
Personopplysningar om privatpersonar er skjulte i Placepoint til de har fortalt oss kva de treng dei til, og vi har godkjent det. Det gjeld alle kundar, òg dykk som såg slike opplysningar i Placepoint 1. Utan tilgang blir privatpersonar viste som Privatperson, medan føretak alltid blir viste med namn og organisasjonsnummer.
Korleis får vi tilgang?
Send ein e-post til support@placepoint.no med dette:
- Kva de skal bruke opplysningane til, så konkret som mogleg. Til dømes sal av bustader de har oppdrag på, eller kredittvurdering av lånesøkjarar.
- Behandlingsgrunnlaget de byggjer på. For dei fleste er det berettiga interesse etter personvernforordninga artikkel 6 nr. 1 bokstav f.
- Kva opplysningar de treng: eigarar, kjøparar og seljarar i Noreg, aksjonærar og rolleinnehavarar, eller eigarar i Sverige.
- Ei stadfesting på at de vil følgje personvernreglane og berre bruke opplysningane til formålet de har oppgitt.
Vi vurderer behovet og svarar på e-posten. Når behovet er godkjent, opnar vi tilgangen, og han gjeld alle brukarane i kontoen dykkar.
Kvifor må vi grunngi behovet?
Fordi reglane for opplysningane krev eit konkret formål, og vi må kunne dokumentere det.
- Forskrift om opplysningar frå grunnbok og matrikkel § 4 lèt oss gi opplysningar frå grunnboken vidare berre til den som kan dokumentere berettiga interesse. Eigaropplysningar frå matrikkelen krev berettiga interesse etter matrikkellova § 30.
- Forskrifta § 5 krev at de erklærer skriftleg at de vil halde personvernlovgivinga. Det er punkt 4 i e-posten.
- Personvernforordninga artikkel 5 seier at personopplysningar berre skal brukast til eit bestemt formål, og at det ikkje skal brukast fleire enn formålet treng.
- Kartverket krev i standardvilkåra for delingstenestene sine, punkt 2.5, at vi fører oversikt over kva kundar som får opplysningane, og til kva formål.
Byggjer de på berettiga interesse, må de òg ha vege interessa dykkar mot personvernet til dei det gjeld. Datatilsynet forklarer interesseavveginga.
Kva får vi tilgang til?
Tilgangen har to nivå:
- Standardnivå: namnet på privatpersonar i dei norske kjeldene, det vil seie grunnboken, matrikkelen, aksjonærregisteret og Einingsregisteret frå Brønnøysundregistrene (BRREG).
- Utvida tilgang: eigarar i Sverige, opplysningar frå Enova og fødselsnummer. Det krev ei eiga grunngiving for akkurat dei opplysningane. Fødselsnummer får de berre når de treng det for å identifisere ein person sikkert, etter personopplysningslova § 12.
Placepoint AI viser aldri eigarar som er privatpersonar, eller fødselsnummer, same kva tilgang de har. Kva eit KI-verktøy elles kan få av namn, står i Kva personopplysningar kan eit KI-verktøy få frå Placepoint?
Agenten i Fusion viser det same som panela, etter tilgangen de har. Namn på eigarar av eigedom blir likevel ikkje sende til språkmodellen, med eitt atterhald, sjå Får språkmodellen bak Agenten namn på privatpersonar?
Kva er vi ansvarlege for når tilgangen er opna?
De er behandlingsansvarlege for korleis de brukar opplysningane. Det tyder:
- Bruk opplysningane berre til formålet de oppgav. Eit nytt formål krev ei ny grunngiving til oss.
- Ikkje bruk opplysningar frå grunnboken eller matrikkelen til reklame eller marknadsføring utan samtykke frå den opplysningane gjeld. Det står i forskrifta § 5 tredje ledd.
- Gi dei registrerte informasjon om behandlinga etter personvernforordninga artikkel 14, med dei unntaka Datatilsynet skildrar.
- Ikkje lagre opplysningane lenger enn formålet krev.
- La kvar person logge inn med sin eigen konto, sjå Konto og innlogging.
Bryt ein kunde reglane, må vi stengje tilgangen og varsle leverandøren av dataa. For data frå Kartverket følgjer det av vilkåra til Kartverket og forskrifta § 6.
Kva reglar gjeld for eigarar i Sverige?
Svenske eigaropplysningar kjem frå Lantmäteriet. Lag (2000:224) om fastighetsregister 2 § listar opp formåla som personopplysningar frå fastighetsregisteret kan brukast til, mellom anna omsetning av eigedom, kreditt- og forsikringsvurderingar og eigedomsforvaltning. Formålet de oppgir, må passe inn i eitt av dei, og Lantmäteriet prøver formålet før dei utleverer personopplysningar (Lantmäteriet: Anvisningar, del 2 fastighetsinformation, punkt 3).
IMY, det svenske datatilsynet, skildrar det same kravet: før personopplysningar blir gitt vidare, skal den som gir dei ut, finne ut kvifor mottakaren vil ha dei, om dei verkeleg treng dei, og kva dei skal brukast til (IMY: Intresseavvägning).
Databehandlaravtale
Treng eg databehandlaravtale med Placepoint?
Ja, viss du legg personopplysningar inn i Placepoint. Det gjer du i praksis når du lastar opp eigne datasett med namn eller kontaktopplysningar, brukar Placepoint Dataset MCP mot eigne prosjekt, bestiller eit uttrekk der du sender oss personopplysningar som nøkkel, eller skriv eit fødselsnummer i eit oppslag. Då behandlar vi opplysningane på ditt oppdrag, og GDPR artikkel 28 krev ein skriftleg avtale før behandlinga startar.
Persondatafelta i Placepoint API krev òg databehandlaravtale. Brukar du berre registerdataa og kartet, trengst det ingen databehandlaravtale for det. Mange inngår han likevel fordi innkjøp ber om det, og det går fint. Då avgrensar vi bilag A til det vi faktisk behandlar: brukarkontoane, innlogginga og loggane. Registerdataa blir haldne utanfor.
Kva inneheld databehandlaravtalen til Placepoint?
Vi har ein mal etter artikkel 28 som advokat har gått gjennom, med fire bilag:
- Bilag A: kva som blir behandla, kva kategoriar av registrerte det gjeld, og formålet.
- Bilag B: underdatabehandlarane vi brukar, med teneste og land.
- Bilag C: instruksen for behandlinga.
- Bilag D: endringslogg.
Avtalen avgrensar oppdraget til dataa du sjølv legg inn. Registerdataa står utanfor, av grunnen som er skildra over. Be om avtalen frå kontaktpersonen din eller support@placepoint.no, så fyller vi ut bilaga saman.
Kan eg bruke min eigen databehandlaravtale?
Ja. Vi fyller gjerne ut malen din, og har gjort det for kommunar, bankar og forsikringsselskap. To ting ber vi om å få inn i alle malar: at registerdata frå matrikkel, grunnbok og føretaksregister blir leverte av oss som sjølvstendig behandlingsansvarleg og ikkje er omfatta av avtalen, og at lista over underdatabehandlarar er den vi publiserer på docs, slik at ho kan haldast oppdatert utan ein ny signaturrunde.
Krev malen at all behandling skjer i EU/EØS, eller at kvar overføring ut av EØS byggjer på standardkontraktsklausular, må det punktet tilpassast lista. Sentry og HubSpot ligg i USA under EU-US Data Privacy Framework, og KI-funksjonane i Fusion brukar Anthropic i USA.
Lagring og drift
Kvar blir dataa lagra?
I Microsoft Azure i regionen Norway East, med replikert kopi i Norway West. Det gjeld registerdataa, kartlaga, brukardatabasen og datasetta du lastar opp. Unntaket er Placepoint AI for Sverige, serveren for svensk eigedom, som køyrer hos Amazon Web Services (AWS) i Irland. Nokre støttetenester, som feillogging og kundesystem, blir drivne av leverandørar med serverar i EU eller USA, og KI-funksjonane i Fusion (Agenten, kartlag-chat og filter-chat) brukar språkmodellar frå Anthropic i USA. Kva leverandørar det er, kva dei behandlar og kva overføringsgrunnlag som gjeld, står i lista over underdatabehandlarar.
Gjeld amerikansk lov for dataa, som CLOUD Act?
Ja, hos leverandørane som er amerikanske selskap. CLOUD Act er ei amerikansk lov frå 2018 som lèt amerikanske styresmakter krevje ut data frå amerikanske skytenester, òg når dataa ligg i eit anna land. Microsoft, som driftar Azure der plattforma og dataa ligg, er eit amerikansk selskap. Det same gjeld dei fleste i lista over underdatabehandlarar, òg Anthropic.
Mot dette står pliktene Microsoft har i databehandlaravtalen sin, og som Microsoft skildrar for offentlege kundar: Microsoft utleverer ikkje data til styresmakter utan at lova krev det, prøver å vise styresmaktene vidare til oss, varslar oss med ein kopi av kravet med mindre lova forbyr det, og kan bestride kravet i retten når det strir mot lova i landet der dataa ligg. Databasane er krypterte i kvile med standardkrypteringa til Azure, der Microsoft forvaltar nøklane. Vi har ingen eigne tiltak mot CLOUD Act utover dette.
Kva personopplysningar behandlar Placepoint om brukarane?
Namn, e-postadresse og telefonnummer knytte til kontoen, kva verksemd brukaren høyrer til, og loggar over innloggingar og bruk. Bruksloggen er det som lèt oss dokumentere kven som har sett kva personopplysningar, noko vi er pålagde for data frå grunnboken. Det er òg difor kvar person må logge inn med sin eigen konto.
Korleis blir dataa sikra?
- Kvar brukar har ein personleg konto, og tilgangen til personopplysningar blir sett per konto etter ei konkret vurdering av behandlingsgrunnlag.
- Kvar innlogging blir logga med IP-adresse, og brukarvilkåra krev at tenesta blir brukt frå EU/EØS, sjå Tilgang utanfor EU/EØS.
- All trafikk er kryptert med TLS, og databasane er krypterte i kvile med standardkrypteringa til Azure.
- Produksjonsdataa blir replikerte til ein annan Azure-region, og tilgangen til dei er avgrensa til namngitte driftsansvarlege.
- Hendingar i plattforma blir logga, slik at vi kan etterspore kven som har gjort kva.
TLS-versjonar, cipher suites, vertsnamn og tryggingskopiar står på Teknisk tryggleik. Treng innkjøp ei utfylt tryggleiksskildring eller eit leverandørskjema, send det til support@placepoint.no.
Kva skjer ved eit tryggleiksbrot?
Vi varslar deg skriftleg innan 48 timar etter at vi har oppdaga eit brot som gjeld data vi behandlar for deg, med kva som skjedde, kva data som er råka, og kva vi gjer. Det gir deg grunnlag for di eiga vurdering etter GDPR artikkel 33. Kontaktpunktet står i databehandlaravtalen.
Kor lenge lagrar Placepoint dataa?
Eigne datasett, prosjekt og notat ligg til du slettar dei sjølv eller avtalen tek slutt. Når avtalen tek slutt, slettar eller leverer vi tilbake dataa etter det databehandlaravtalen seier, og stadfestar det skriftleg. Opplysningar om brukarane blir lagra så lenge kundeforholdet varer, og deretter så lenge rekneskaps- og avtalereglar krev.
Tryggingskopiane blir ikkje sletta når avtalen tek slutt, men går ut etter fast plan: kopiane for gjenoppretting til eit tidspunkt i sju dagar, dei vekentlege i seks månader, dei månadlege i to år og dei årlege i ti år. Etter det er dataa borte òg frå tryggingskopiane. Korleis kopiane blir lagra, står i Teknisk tryggleik.
Driftsloggane i Azure blir sletta etter 30 dagar, og applikasjonsloggane etter 90 dagar. Oppslag frå KI-verktøy blir sletta etter 90 dagar, sjå Kva loggar Placepoint når eit KI-verktøy hentar data?
Placepoint AI og eigne datasett
Kven er behandlingsansvarleg når eit KI-verktøy hentar data frå Placepoint?
Du. Placepoint AI er MCP-serverar som svarar på oppslag frå det KI-verktøyet du sjølv har valt, med innlogginga di og tilgangsnivået ditt. Det gjeld kvar server vi tilbyr, òg dei som kjem til. Serverane inneheld ingen språkmodell, og vi sender ingen data til ein KI-leverandør. Det er KI-verktøyet som hentar data frå oss på dine vegner, og du bestemmer kva verktøy som blir brukt, kva spørsmål som blir stilte, og kva svara blir brukte til. Dermed er du behandlingsansvarleg for det som skjer i KI-verktøyet, og avtalen din med KI-leverandøren regulerer lagring, lokasjon og eventuell trening der.
Dette er ikkje felles behandlingsansvar etter GDPR artikkel 26, sidan vi verken bestemmer formål eller middel for behandlinga i KI-verktøyet. Ansvaret vårt stoppar ved det som skjer i systema vi sjølve driftar.
Kvar går dataa når eit KI-verktøy brukar Placepoint AI?
Figuren viser dei norske serverane. Placepoint AI for Sverige, serveren for svensk eigedom, køyrer hos Amazon Web Services (AWS) i Irland, og oppslag dit blir behandla der.
Frå oss går dataa berre tilbake til verktøyet som spurde. Vi sender aldri eit oppslag vidare til ein KI-leverandør, og modellen køyrer hos leverandøren av KI-verktøyet, under avtalen din med han. Kva dei vanlegaste leverandørane oppgir om lokasjon, står i Kvar behandlar KI-leverandørane dataa?.
Kva personopplysningar kan eit KI-verktøy få frå Placepoint?
Eigarar av eigedom som er privatpersonar, blir viste som Privatperson, og fødselsnummer blir aldri leverte, same kva tilgang kontoen din elles har. Den utvida tilgangen som enkelte kundar har gjennom dokumentert berettiga interesse, gjeld i Fusion, ikkje i Placepoint AI. Det er dataminimering etter GDPR artikkel 5 nr. 1 bokstav c og innebygd personvern etter artikkel 25, valt fordi dataa hamnar i eit verktøy vi ikkje kontrollerer. Dei personopplysningane som står att, er dei som allereie er offentlege: namn på rolleinnehavarar i selskap frå Brønnøysundregistrene, altså dagleg leiar og styre, og namn og fødselsår på aksjonærar frå Aksjonærregisteret, som Skatteetaten offentleggjer. Aksjonærar blir viste som Privatperson til KI-verktøyet ber om namn. Namn på rolleinnehavarar og aksjonærar blir leverte uavhengig av om kontoen er godkjend for personopplysningar, så her kan eit KI-verktøy få namn som Fusion skjuler for den same kontoen. Fødselsnummer blir aldri leverte. Detaljar: Personopplysningar er ikkje tilgjengelege.
Kva loggar Placepoint når eit KI-verktøy hentar data?
Kvart oppslag frå Placepoint AI blir logga med kva verktøy som vart kalla, kva KI-verktøyet sende i oppslaget, og kven som spurde: mellom anna brukar-ID, IP-adresse og verksemd. Innhaldet i oppslaget, som søkjeord, adresser og matrikkelnummer, blir lagra avkorta etter 2 000 teikn. Svaret vi sender tilbake, blir ikkje logga, berre kor stort det var. Loggen ligg i Microsoft Azure i Norway East og blir sletta etter 90 dagar. Det gjeld Placepoint MCP og Placepoint Dataset MCP. Oppslag til Placepoint AI for Sverige blir behandla hos AWS i Irland.
Loggen har to formål. Det første er drift og feilsøking. Der er du behandlingsansvarleg for innhaldet i oppslaget og vi databehandlar, på same måte som for eit søk i Fusion. Det andre er å kunne etterspore kven som har henta kva, og det gjer vi som behandlingsansvarleg.
Skilnaden frå Fusion er at KI-verktøyet skriv oppslaget for deg. Har verktøyet tilgang til eigne dokument, kan modellen ta med tekst frå dei i eit oppslag. Det styrer du i KI-verktøyet, med instruksjonar om kva oppslaga skal innehalde. Eit ferdig døme står i Send berre det oppslaget treng.
Vi kan òg slå på minimal logging for verksemda di. Då loggar vi berre kva verktøy som vart brukt, kven som spurde, og når. Innhaldet i oppslaget, IP-adressa og feilmeldingar blir ikkje lagra. Det gjeld alle brukarane i verksemda. Kontakt kontaktpersonen din eller support@placepoint.no for å slå det på.
Kva med datasett eg lastar opp via Dataset MCP?
Dei blir behandla som når du lastar dei opp i Fusion: dei blir lagra hos oss i Azure Norway East, er berre synlege for brukarar du sjølv har gitt tilgang til prosjektet, og er omfatta av databehandlaravtalen. Kva du lastar opp, og om det inneheld personopplysningar, styrer du sjølv. Inneheld det personopplysningar, må databehandlaravtalen vere på plass først.
Brukar Placepoint dataa til å trene modellar?
Nei. Vi trenar ingen modellar på kundedata eller bruksdata, og vi deler dei ikkje med tredjepartar utover driftsleverandørane i lista over underdatabehandlarar. Anthropic, som leverer språkmodellane bak Agenten, kartlag-chat og filter-chat i Fusion, kan heller ikkje trene modellar på det vi sender dit. Det står i dei kommersielle vilkåra til Anthropic. Brukar KI-verktøyet du har valt, data til trening, er det regulert av avtalen din med den leverandøren, ikkje av oss.
Gjeld det same for Agenten i Fusion?
Agenten køyrer i Fusion med innlogginga di og følgjer tilgangsnivået ditt i plattforma, slik Agent-sida skildrar. Han er i pilot og krev lisens: vi slår han på for dei brukarane verksemda har kjøpt lisens til. Agenten brukar språkmodellar frå Anthropic i USA. Det gjer òg kartlag-chat og filter-chat i Fusion, som er på for alle brukarar og sender teksten brukaren skriv i dei. Anthropic står i lista over underdatabehandlarar.
Namn og fødselsår på privatpersonar blir ikkje sende til Anthropic, sjå neste spørsmål.
Får språkmodellen bak Agenten namn på privatpersonar?
Ikkje namn på eigarar av eigedom. Når Agenten slår opp kven som eig ein eigedom, får språkmodellen ein referanse i staden for namnet. Fusion set inn namnet først når svaret blir vist for deg, med same tilgangskontroll som i panela:
- Er verksemda godkjend for personopplysningar, ser du namnet, slik du gjer i Eigarar-fanen.
- Er ho ikkje godkjend, ser du Privatperson.
Språkmodellen får verken namn, fødselsår eller fødselsnummer på privatpersonar frå matrikkelen eller grunnboken, same kva tilgang de har. Det er dataminimering etter GDPR artikkel 5 nr. 1 bokstav c, valt fordi modellen køyrer hos ein leverandør i USA.
Opplysningar frå opne register er unntaket. Styremedlemmer, dagleg leiar og revisor står ope hos Brønnøysundregistrene, og aksjonærar står i aksjonærregisteret, som er offentleg. Spør du om roller eller eigarar i eit selskap, kan språkmodellen få namn og fødselsår på desse personane. Fødselsnummer får han aldri. Føretak blir viste med namn og organisasjonsnummer.
Det gir eitt atterhald for eigarar av eigedom. Har ein privatperson som eig eigedom, òg eit verv eller aksjar i eit selskap, står namnet i dei opne registera. Er både eigedomen og selskapet med i den same samtalen, kan språkmodellen knyte referansen til namnet.
To ting kan likevel nå språkmodellen: eit namn du sjølv skriv i spørsmålet, og innhald frå system de har kopla til Agenten, som dokument og datasett. Det er dykkar eigne data, og de vel sjølve kva de sender.
DORA og finansføretak
Gjeld DORA for Placepoint?
Ikkje direkte. DORA er EU-forordninga om digital operasjonell motstandsdyktigheit i finanssektoren, og gjeld i Noreg gjennom DORA-lova frå 1. juli 2025. Krava rettar seg mot bankar, forsikringsselskap og andre finansføretak under tilsyn av Finanstilsynet. Berre leverandørar som blir utpeikte som kritiske på EU-nivå, er under direkte tilsyn, og Placepoint er ikkje utpeikt.
For eit finansføretak er vi ein IKT-tredjepartsleverandør, fordi Fusion, Placepoint API og Placepoint AI er digitale tenester og datatenester som blir leverte fortløpande. Avtalen med oss høyrer normalt heime i informasjonsregisteret ditt etter artikkel 28 nr. 3, og han skal ha vilkåra i DORA artikkel 30.
Går Placepoint med på kontraktsvilkåra i DORA artikkel 30?
Ja. Kontakt kontaktpersonen din eller support@placepoint.no, så avtaler vi vilkåra i artikkel 30 nr. 2 med dykk. Har verksemda di ein eigen mal for DORA-vilkår, brukar vi gjerne den.
Du vurderer sjølv om tenesta støttar ein kritisk eller viktig funksjon. Gjer ho det, avtaler vi òg vilkåra i artikkel 30 nr. 3, som mellom anna gjeld tenestenivå, revisjon og ein plan for overgang til ein annan leverandør.
Kva tyder det at tenesta ikkje er kritisk eller viktig?
Då gjeld DORA framleis for avtalen, men med færre krav. Vilkåra i artikkel 30 nr. 3 trengst ikkje, og heller ikkje trusselbasert penetrasjonstesting (TLPT) etter artikkel 26 eller dei andre krava som berre gjeld leverandørar av kritiske eller viktige funksjonar. Avtalen skal framleis ha vilkåra i artikkel 30 nr. 2 og stå i informasjonsregisteret ditt.
Kvar dataa ligg, står i Lagring og drift, og kven som behandlar dei for oss, i lista over underdatabehandlarar.
For innkjøp og personvernombod
Kva kan eg be Placepoint om?
- Databehandlaravtalen vår, eller ein utfylt versjon av din eigen mal.
- Vilkår etter DORA artikkel 30, gjerne i din eigen mal, sjå DORA og finansføretak.
- Lista over underdatabehandlarar, med teneste, land og overføringsgrunnlag.
- Personvernerklæringa og brukarvilkåra.
- Ei skildring av tryggleikstiltaka, eller svar på eit leverandørskjema.
- Ei utgreiing om kva personopplysningar som inngår i leveransen, sjå Integrasjon og tryggleik.
- Tilgang til personopplysningar om privatpersonar, sjå Tilgang til personopplysningar.
Korleis fyller de ut tryggleiksskjemaet vårt?
Vi svarar på delane som gjeld leveransen vår, og merkjer resten «ikkje relevant» med ei kort grunngiving, til dømes krav som berre gjeld leverandørar av kritiske funksjonar etter DORA. Svara skildrar nivået vi har når avtalen blir signert. Der vi ikkje oppfyller eit krav fullt ut, svarar vi nei eller delvis. Det vi skriv oftast, står i Kort oppsummering for leverandørskjema.
Kven er kontaktpunkt for personvern?
support@placepoint.no. Førespurnaden går til rett person hos oss, og vi svarar innan 30 dagar på krav om innsyn, retting og sletting, slik personvernerklæringa skildrar.
Eg står i grunnboken eller føretaksregisteret. Kva har Placepoint om meg?
Det kjeldene har registrert: for ein heimelshavar namn, fødselsår og eigardel frå grunnboken, for ein rolleinnehavar namn og rolle frå Brønnøysundregistrene. Vi samlar ikkje inn meir om privatpersonar enn det som står i kjeldene, og vi viser privatpersonar som Privatperson for kundar som ikkje har dokumentert eit behov. Vil du vite kva som er registrert om deg, eller meiner du noko er feil, kontakt oss på support@placepoint.no. Feil i kjelda blir retta hos Kartverket eller Brønnøysundregistrene (BRREG), og rettinga kjem til oss ved neste oppdatering.
Underdatabehandlarar
Leverandørane vi brukar for å drifte Placepoint, og som difor behandlar personopplysningar på vegner av oss. Databehandlaravtalen viser til denne lista, så ho blir halden oppdatert her.
Før vi tek i bruk ein ny underdatabehandlar, oppdaterer vi lista og varslar kundar med databehandlaravtale på e-post minst 30 dagar i førevegen. Du kan protestere innan fristen.
Sist oppdatert 20. november 2026.
| Leverandør | Teneste | Behandlar | Land og region | Overføringsgrunnlag |
|---|---|---|---|---|
| Microsoft Ireland Operations Ltd. (Azure) | Drift, databasar, lagring, innlogging (Entra) | Alle data i plattforma, inkludert eigne datasett og brukardatabasen | Noreg, Norway East med replika i Norway West | EØS |
| Amazon Web Services (AWS) | Drift av Placepoint AI for Sverige, serveren for svensk eigedom | Oppslag frå KI-verktøy om svensk eigedom, med brukar-ID frå innlogginga | EU, Irland | EØS |
| PostHog Inc. (EU-teneste) | Produktanalyse og funksjonsstyring i Fusion | Brukar-ID, hendingar i grensesnittet | EU, Tyskland | EØS |
| Mixpanel Inc. (EU-teneste) | Bruksanalyse | Brukar-ID, hendingar i grensesnittet | EU | EØS |
| Better Stack GmbH | Driftslogg for tenestene | Brukar-ID, tenant-ID, førespurnader til tenestene | EU, Tyskland | EØS |
| Twilio SendGrid (EU-teneste) | System-e-post, som invitasjonar og varsel | Namn, e-postadresse, innhald i varselet | EU, Tyskland | EØS |
| ipapi.is | Oppslag av land og by for IP-adressa ved innlogging | IP-adressa, avkorta til nettverket ho høyrer til | EU, Tyskland | EØS |
| Functional Software Inc. (Sentry) | Feillogging | Brukar-ID, e-postadresse, IP-adresse, feilmeldingar | USA | EU-US Data Privacy Framework |
| HubSpot Inc. | Kundesystem, support-chat og e-post | Namn, e-postadresse, telefonnummer, førespurnader | USA | EU-US Data Privacy Framework |
| Slack Technologies LLC | Spegling av support-chat til supportteamet | Innhaldet i chat-førespurnader | EU | Standardkontraktsklausular |
| Anthropic, PBC (Anthropic Ireland, Limited som avtalepart for EØS) | Språkmodellar for Agenten, kartlag-chat, filter-chat og 3D-modellgenerering i Fusion | Teksten brukaren skriv i desse funksjonane. For Agenten òg samtalen og oppslagsresultat. Privatpersonar som eig eigedom, er bytte ut med ein referanse. Namn frå opne register (roller hos Brønnøysundregistrene og aksjonærregisteret) kan inngå | USA | Standardkontraktsklausular |
Kva som ikkje står i lista
Dataleverandørane våre, som Kartverket, Brønnøysundregistrene (BRREG) og dei andre på leverandørsidene, er kjelder vi hentar data frå, ikkje databehandlarar for oss. Dei behandlar ingen opplysningar om brukarane eller datasetta dine.
Kart- og analysetenester som reisetid og bakgrunnskart får koordinatar og adresser i oppslaget, ikkje kven som spurde.
KI-verktøyet du koplar Placepoint AI til, vel du sjølv, og det står under avtalen din med den leverandøren. Kvifor det er slik: Placepoint AI og eigne datasett.
Kort oppsummering for leverandørskjema
Punkta innkjøp og IT-tryggleik spør etter, med lenkje til det fulle svaret. Treng de skjemaet dykkar utfylt, send det til support@placepoint.no.
- Drift og lagring: Microsoft Azure i Norway East, med replika i Norway West. Placepoint AI for Sverige køyrer hos AWS i Irland. Kvar blir dataa lagra?
- CLOUD Act: Microsoft og dei fleste underdatabehandlarane er amerikanske selskap og er omfatta av lova. Vi har ingen eigne tiltak utover pliktene Microsoft har i databehandlaravtalen. Gjeld amerikansk lov for dataa, som CLOUD Act?
- Innlogging: personleg konto for kvar brukar, e-post og passord, og eingongskode på e-post når kontoen blir aktivert eller passordet blir bytt. Konto og innlogging
- Bruk utanfor EU/EØS: inga teknisk sperre, men kvar innlogging blir logga med IP-adresse, og brukarvilkåra krev bruk frå EU/EØS. Tilgang utanfor EU/EØS
- Kryptering: TLS for all trafikk, kryptering i kvile i databasane. Korleis blir dataa sikra?
- Tilgangsstyring: personopplysningar om privatpersonar blir opna per konto etter dokumentert behov, og tilgangen til produksjonsdata er avgrensa til namngitte driftsansvarlege. Tilgang til personopplysningar
- Sporbarheit: bruksloggen viser kven som har sett kva personopplysningar. Kva personopplysningar behandlar Placepoint om brukarane?
- Placepoint AI: ingen språkmodell, ingen data til ein KI-leverandør. Eigarar av eigedom blir viste som Privatperson og fødselsnummer blir aldri leverte, medan namn på rolleinnehavarar og aksjonærar kan bli leverte. Oppslag til dei norske serverane blir logga i Norway East og sletta etter 90 dagar, og minimal logging kan slåast på per verksemd. Placepoint AI og eigne datasett
- KI i Fusion: Agenten (lisens per brukar), kartlag-chat og filter-chat (på for alle) brukar språkmodellar frå Anthropic i USA under standardkontraktsklausular. Agenten sender ikkje namn eller fødselsår på privatpersonar som eig eigedom, til modellen. Namn frå opne register (roller og aksjonærar) kan inngå, òg for ein eigar som står der. Gjeld det same for Agenten i Fusion?
- Trening: ingen modellar blir trena på kundedata eller bruksdata, heller ikkje hos Anthropic. Brukar Placepoint dataa til å trene modellar?
- Avvik: skriftleg varsel innan 48 timar ved brot som gjeld dataa dine. Kva skjer ved eit tryggleiksbrot?
- Avtalar: databehandlaravtale etter artikkel 28, vår mal eller din, og vilkår etter DORA artikkel 30. Er tenesta ikkje kritisk eller viktig for dykk, gjeld berre artikkel 30 nr. 2. Databehandlaravtale, DORA og finansføretak
- Underdatabehandlarar: publisert liste med teneste, land og overføringsgrunnlag. Sentry og HubSpot ligg i USA under EU-US Data Privacy Framework, Anthropic i USA under standardkontraktsklausular, resten i EU/EØS. Nye underdatabehandlarar blir varsla minst 30 dagar i førevegen. Underdatabehandlarar
- Sletting: eigne data blir sletta eller leverte tilbake når avtalen tek slutt, stadfesta skriftleg. Tryggingskopiane går ut etter fast plan, dei årlege etter ti år, og drifts- og applikasjonsloggane blir sletta etter 30 til 90 dagar. Kor lenge lagrar Placepoint dataa?
Kvar behandlar KI-leverandørane dataa?
Vår del er den same uansett verktøy: serverane våre køyrer i Noreg, Placepoint AI for Sverige i Irland, og vi sender ingenting til ein KI-leverandør. Kvar modellen køyrer og kva som blir lagra der, avgjer avtalen din med leverandøren av KI-verktøyet. Tabellen viser kva dei vanlegaste leverandørane sjølve oppgir, sjekka 30. oktober 2026, Microsoft Foundry 31. oktober. Be leverandøren din stadfeste det som gjeld for avtalen dykkar før de konkluderer.
| KI-verktøy | Kva leverandøren oppgir | Kjelde |
|---|---|---|
| Claude (claude.ai og API-et til Anthropic) | Lagring i USA. Trafikken kan bli behandla i USA, Europa, Asia og Australia, og behandling berre i USA kan veljast. Ingen EU-region. | Anthropic: Where are your servers located? |
| Claude i Amazon Bedrock eller Google Vertex AI | Claude-modellane kan køyrast i EU-regionar, med AWS eller Google som databehandlar i staden for Anthropic. Krev eige oppsett og eit KI-verktøy som støttar det. | Claude in Amazon Bedrock, Claude Opus 5.5 on Google Cloud |
| Claude i Microsoft Foundry | To val. Hosted on Azure køyrer modellen på Azure, lagrar dataa i Azure-geografien de vel, og behandlar dei globalt eller i USA. Foundry har inga EU-sone for Claude. Hosted on Anthropic kan behandle dataa utanfor Azure og utanfor regionen. Anthropic er databehandlar i begge. | Microsoft: Compare hosting options for Claude models in Microsoft Foundry |
| ChatGPT Enterprise og Edu | Lagring i Europa (EØS og Sveits) kan veljast, og for kvalifiserte kundar òg køyring av modellen i Europa. Innlogging, ruting og anna behandling utan GPU kan skje utanfor regionen. | OpenAI: Data residency and inference residency for ChatGPT |
| Microsoft 365 Copilot | EU Data Boundary-teneste for EU-kundar, så trafikken blir halden innanfor EU-grensa. Modellar frå Anthropic i Copilot er unnatekne. Spørsmål og svar blir ikkje brukte til å trene modellar. | Microsoft: Data, Privacy, and Security for Microsoft Copilot |
| Modellar drifta i EU, som Mistral, Azure OpenAI i ein EU-region eller eiga drift | Lokasjonen følgjer leverandøren eller drifta de vel. Placepoint AI verkar med alle MCP-klientar, sjå Andre MCP-klientar. | Dokumentasjonen til leverandøren |
Vanlege spørsmål om KI og datalagring
Korte svar på spørsmåla vi oftast får frå innkjøp, personvernombod og IT-tryggleik, uavhengig av om de brukar Claude, ChatGPT, Copilot eller eit anna KI-verktøy. Kvart svar lenkjer til det fulle svaret.
Lagrar eller behandlar Placepoint dataa våre i USA?
Plattforma, databasane, kartlaga, datasetta du lastar opp og Placepoint AI køyrer i Microsoft Azure i Noreg. Unntaket er Placepoint AI for Sverige, som køyrer hos AWS i Irland. Tre ting går til USA: feillogging og kundesystem (Sentry og HubSpot), språkmodellane bak Agenten, kartlag-chat og filter-chat i Fusion (Anthropic), og adressesøk, som brukar Azure Maps på eit globalt endepunkt. Microsoft og fleire av dei andre leverandørane er dessutan amerikanske selskap, og då gjeld amerikansk lov same kvar dataa ligg. Sjå Kvar blir dataa lagra?, CLOUD Act og Underdatabehandlarar.
Sender Placepoint AI oppslaga våre vidare til ein KI-leverandør?
Nei. Serverane inneheld ingen språkmodell og svarar berre på oppslag frå det KI-verktøyet du sjølv har kopla til med di eiga innlogging. Sjå Kven er behandlingsansvarleg når eit KI-verktøy hentar data frå Placepoint?.
Vi brukar Claude, ChatGPT eller Copilot. Kvar hamnar dataa?
Hos leverandøren av KI-verktøyet, under avtalen dykkar med han. Kva dei vanlegaste leverandørane oppgir om lokasjon, står i Kvar behandlar KI-leverandørane dataa?.
Kan vi halde all behandling innanfor EU/EØS?
For Placepoint AI, nesten: serverane køyrer i Noreg, Placepoint AI for Sverige i Irland, og med eit KI-verktøy som køyrer modellen i EU/EØS, til dømes Claude gjennom Amazon Bedrock i ein EU-region, ChatGPT Enterprise med europeisk køyring eller ein modell de driftar sjølve, køyrer òg modellen i Europa. Claude gjennom Microsoft Foundry kan ikkje haldast i EU/EØS, sjå tabellen over KI-leverandørar. Unntaket hos oss er adressesøk via Azure Maps, som brukar eit globalt endepunkt. Agenten, kartlag-chat og filter-chat i Fusion brukar Anthropic i USA og kan ikkje haldast i EU/EØS i dag. Kontakt oss, så går vi gjennom oppsettet med dykk.
Ser KI-verktøyet namn og fødselsnummer på privatpersonar?
Delvis. Eigarar av eigedom blir viste som Privatperson, og fødselsnummer blir aldri leverte. Namn på rolleinnehavarar i selskap og namn og fødselsår på aksjonærar kan bli leverte når KI-verktøyet ber om det, uavhengig av om kontoen er godkjend for personopplysningar i Fusion, sidan dei er offentlege hos Brønnøysundregistrene og Skatteetaten. Sjå Kva personopplysningar kan eit KI-verktøy få frå Placepoint?.
Kva loggar de om oppslaga frå KI-verktøyet, og kor lenge?
Kva verktøy som vart kalla, kva KI-verktøyet sende, avkorta etter 2 000 teikn, og kven som spurde. For dei norske serverane ligg loggen i Noreg og blir sletta etter 90 dagar, og svaret vi sende, blir ikkje logga. Sjå Kva loggar Placepoint når eit KI-verktøy hentar data?.
Kan tekst frå våre eigne dokument hamne i loggen dykkar?
Ja, viss modellen tek med tekst frå dokumenta i eit oppslag. Det styrer de med ein instruksjon i KI-verktøyet, og med minimal logging lagrar vi ikkje innhaldet i oppslaget i det heile. Sjå Send berre det oppslaget treng og Kva loggar Placepoint når eit KI-verktøy hentar data?.
Trenar de modellar på dataa våre?
Nei. Vi trenar ingen modellar på kundedata eller bruksdata, og Anthropic kan ikkje trene på det KI-funksjonane i Fusion sender dit. Om KI-verktøyet de brukar gjer det, er styrt av avtalen dykkar med den leverandøren. Sjå Brukar Placepoint dataa til å trene modellar?.
Kva med Agenten i Fusion?
Agenten køyrer i Fusion med innlogginga di og følgjer tilgangsnivået ditt, og han er av til verksemda har kjøpt lisens til dei brukarane som skal ha han. Han brukar språkmodellar frå Anthropic i USA, som står i lista over underdatabehandlarar. Namn på privatpersonar som eig eigedom, blir ikkje sende dit, med eitt atterhald for eigarar som òg står i opne register, sjå Får språkmodellen bak Agenten namn på privatpersonar?.
Kan vi slå av KI for brukarane våre?
Det meste. Utan plass på lisensen for Placepoint AI får ingen i verksemda kopla eit KI-verktøy til Placepoint, og Agenten er av til de kjøper lisens. Kartlag-chat og filter-chat i Fusion er på for alle brukarar og har ingen brytar per verksemd i dag. Dei sender berre teksten brukaren skriv i dei. Sjå Kven har AI-tilgang?.
Signerer de databehandlaravtale, og kan vi bruke vår eigen mal?
Ja og ja. Vi har ein mal som advokat har gått gjennom, med fire bilag, og fyller gjerne ut din, med to faste punkt om registerdata og lista over underdatabehandlarar. Sjå Databehandlaravtale.
Gjeld DORA, og godtek de vilkåra i artikkel 30?
DORA gjeld finansføretaket, og for dykk er vi ein IKT-tredjepartsleverandør. Vi avtaler vilkåra i artikkel 30 nr. 2, og nr. 3 viss tenesta støttar ein kritisk eller viktig funksjon. Sjå DORA og finansføretak.
Kven er underdatabehandlarane dykkar, og kven av dei er i USA?
Lista står på denne sida med teneste, land og overføringsgrunnlag. Sentry (feillogging) og HubSpot (kundesystem) ligg i USA under EU-US Data Privacy Framework, Anthropic (språkmodellar for KI-funksjonane i Fusion) i USA under standardkontraktsklausular, resten i EU/EØS. Sjå Underdatabehandlarar.
Korleis blir innlogginga sikra?
Kvar person har eigen konto og loggar inn med e-post og passord, og ein eingongskode på e-post stadfestar identiteten når kontoen blir aktivert eller passordet blir bytt. Kvar innlogging blir logga med IP-adresse, og vilkåra krev bruk frå EU/EØS. Sjå Konto og innlogging.
Kven svarar på spørsmål om personvern?
support@placepoint.no. Vi svarar innan 30 dagar på krav om innsyn, retting og sletting. Sjå Kven er kontaktpunkt for personvern?.
Sjå òg: Integrasjon og tryggleik, Konto og innlogging, Data og kjelder, Kart og eigedommar, Placepoint AI, Databehandlaravtale (ordbok), GDPR (ordbok).



